7 sentyabr kuni ijtimoiy tarmoqlarda keng tarqalgan videolavha jamoatchilikning keskin bahslariga sabab bo‘ldi. Kadrlarda haydovchi tez yordam mashinasiga yo‘l bermagani aniq ko‘ringan. Mazkur holat bo‘yicha Toshkent viloyati Yo‘l harakati xavfsizligi boshqarmasi rasmiy izoh berdi.
Ma’lumotlarga ko‘ra, voqea Yangiyo‘l tumani hududida qayd etilgan. Qonun himoyachilari olib borgan surishtiruv ishlari natijasida videoda aks etgan Lasetti haydovchisi aniqlandi.
Erkak o‘z xatti-harakatini shunday izohladi:
“Men ham ish bilan shoshib qoldim. Mashina ichida musiqa juda baland edi, derazalar yopiq turgan. Shu bois sirena va signallarni eshitmadim. Faqat mashina yaqinlashganda tushundim. Xatoning jiddiyligini angladim, bunday holat takrorlanmaydi.”
Huquq-tartibot organlari haydovchiga nisbatan qonunchilikda belgilangan moddalar asosida ma’muriy bayonnoma rasmiylashtirdi. Shu bilan birga, u bilan profilaktik suhbat o‘tkazilib, yo‘ldagi mas’uliyat va ehtiyotkorlikning ahamiyati tushuntirildi.
Mutasaddilar ta’kidlashicha, yo‘ldagi har bir daqiqaning ahamiyati bor, ayniqsa, tez yordam kabi maxsus xizmat vositalariga yo‘l bermaslik inson hayotiga xavf solishi mumkin. Shu sabab haydovchilardan qoidalarga qat’iy rioya qilish talab etiladi.
“Zamin”ni Telegramʻda oʻqing!
