Toshkent viloyatida to‘y marosimi chog‘ida qo‘pol qoidabuzarlik sodir etgan kuyov va yana bir nechta fuqarolarga nisbatan huquqiy choralar ko‘rildi. Bu haqda IIV Jamoat xavfsizligi departamenti ma’lum qildi.
Ma’lumotlarga ko‘ra, Olmaliq shahrida kuyov to‘y marosimi paytida o‘zining Vaz-2107 avtomobili bilan drift qilib, yo‘l harakati qoidalarini qo‘pol ravishda buzgan. Bu holat ko‘pchilikning e’tiroziga sabab bo‘ldi. Kuyov esa qilmishidan afsuslanib: “O‘z to‘yimda bo‘lib qoldi, afsusdaman. Bu holat boshqa takrorlanmaydi”, degan.
Tergov davomida ma’lum bo‘lishicha, qoidabuzarlardan biri o‘z avtomashinasi davlat raqam belgisini boshqa mashinaga o‘rnatib, yo‘lda qonunbuzarlik sodir etgan. Ushbu harakatlar "yo‘l bezoriliklari" sifatida baholandi.
Hozirda barcha haydovchilarga nisbatan ma’muriy bayonnoma rasmiylashtirilib, jarima qarorlari qabul qilindi. Shuningdek, kuyovning avtomobili jarima maydoniga joylashtirilgan va hujjatlar sudga yuborilgan.
Eslatib o‘tamiz, avvalroq Samarqandda ham to‘y marosimi chog‘ida drift qilib, qo‘pol qoidabuzarlik sodir etgan besh nafar shaxs jazoga tortilgan edi.
“Zamin”ni Telegramʻda oʻqing!
