Toshkent shahrida sodir bo‘lgan qonli to‘qnashuv jamoatchilik orasida katta muhokamalarga sabab bo‘ldi. Mirobod tumani hududida maktab o‘quvchilari o‘rtasida chiqqan janjal nojo‘ya oqibatlarga olib keldi. Bu haqda Ichki ishlar bosh boshqarmasi rasmiy ma’lumot berdi.
11 sentyabr kuni soat 22:30 atrofida tumandagi 2-uy yaqinida ikki yigitning yo‘li kesishib, ular o‘rtasida og‘zaki tortishuv boshlangan. Ma’lum qilinishicha, 2005 yilda tug‘ilgan yigit o‘z tengdoshi bilan birga ketayotganda, ularga maktab o‘quvchilaridan iborat guruh duch kelgan va nizo yuzaga chiqqan.
Bahs avjiga chiqqanida 2008 yilda tug‘ilgan maktab o‘quvchisi Sh.O.ga o‘tkir buyum bilan zarba berilgan. Natijada o‘quvchi og‘ir jarohat olib, tezda kasalxonaga yotqizilgan. Shifokorlar uning hayotini saqlab qolish uchun zarur choralarni ko‘rmoqda va holat doimiy nazorat ostiga olingan.
Huquq-tartibot organlari mazkur holat yuzasidan jinoyat ishi qo‘zg‘atgan. Mirobod tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 277-moddasi (bezorilik) bo‘yicha surishtiruv boshlangan.
Mutasaddilarning ta’kidlashicha, tergov harakatlari hozirda davom etmoqda va ularning natijalariga ko‘ra qonuniy qaror qabul qilinadi.
Jamoatchilik esa bunday holatlar yoshlar orasidagi zo‘ravonlikning oldini olish zarurligini, maktab o‘quvchilari va o‘smirlar tarbiyasiga jiddiy e’tibor qaratish kerakligini ta’kidlamoqda.
“Zamin”ni Telegramʻda oʻqing!
