Navoiy viloyatida sodir bo‘lgan holat butun ijtimoiy tarmoqlarda katta muhokamalarga sabab bo‘ldi. Viloyat Ichki ishlar boshqarmasi ma’lumot berishicha, 15 sentyabr kuni Navbahor tumanida olib borilgan profilaktika tadbirlari davomida bolalar hayotiga jiddiy xavf tug‘diruvchi holat qayd etilgan.
Nazoratda bo‘lgan Damas avtomobili to‘xtatilganda haydovchi salonda jami 23 nafar bog‘cha tarbiyalanuvchisini va ularga hamroh bo‘lgan 2 nafar tarbiyachini tashiyotgani aniqlandi. Yana ham ajablanarlisi, haydovchining aytishicha, salonda uning o‘z farzandi ham bo‘lgan.
Holatni yanada og‘irlashtirgan jihat – haydovchi nafaќat mast holda, balki haydovchilik guvohnomasisiz transport vositasini boshqargan. Bu esa nafaqat qonun buzilishi, balki bolalar hayoti uchun juda katta xavf solishi bilan alohida e’tiborga arziydi.
Huquq-tartibot idoralari haydovchiga nisbatan tegishli choralar ko‘rdi. Damas avtomobili vaqtincha jarima maydonchasiga joylashtirildi, haydovchi esa qonun doirasida javobgarlikka tortiladi.
Mutaxassislar ta’kidlashicha, bu kabi holatlar yo‘l harakati xavfsizligiga jiddiy tahdiddir. Xususan, bolalarni tashishda har qanday qonunbuzarlikning oqibati fojiali tugashi mumkin. Shu bois, nafaqat davlat idoralari, balki ota-onalar ham bolalarni maktabgacha muassasaga olib borishda ishonchli va xavfsiz yo‘llarni tanlashi zarurligi qayd etilmoqda.
Jamoatchilikning fikricha, bu kabi qonunbuzarliklarga nisbatan qat’iy choralar ko‘rilishi va keng targ‘ibot ishlari olib borilishi kerak. Chunki bolalarning hayoti va sog‘ligi eng yuqori qadriyat bo‘lib, unga beparvo qarash jamiyat kelajagiga ham befarqlikni anglatadi.
“Zamin”ni Telegramʻda oʻqing!
