Rossiyada sodir bo‘lgan noxush hodisa yuzasidan yangi ma’lumotlar ochiqlandi. Avval xabar qilinganidek, Sankt-Peterburg shahrida Rossiya Federatsiyasi Oliy sudi va Sud departamenti qurilish maydonida baxtsiz hodisa oqibatida bir o‘zbekistonlik yigit halok bo‘lgan edi.
O‘zbekistonning Sankt-Peterburgdagi Bosh konsulxonasi rasmiy bayonot bilan chiqib, marhumning shaxsi aniqlanganini ma’lum qildi. Ma’lumotlarga ko‘ra, vafot etgan yigit — 2001 yilda Surxondaryo viloyatida tug‘ilgan O‘zbekiston fuqarosi A.U. bo‘lib chiqdi. U joriy yil aprel oyidan buyon Peterburgda mehnat qilib, metall konstruksiyalar montajchisi sifatida ishlab kelayotgani qayd etildi.
Tafsilotlarga ko‘ra, 16 sentyabr kuni montaj ishlari jarayonida yigit 15 metr balandlikdan yiqilib tushgan. Afsuski, olingan og‘ir jarohatlar oqibatida u voqea joyida vafot etgan. Jasad morgga yuborilgan, hozirda tergovchilar hodisa yuzasidan tekshiruv ishlarini olib borishmoqda va jinoyat ishi qo‘zg‘atish ehtimoli ko‘rib chiqilmoqda.
Bosh konsulxona hamda Moskvadagi Migratsiya agentligi vakolatxonasi hozirda marhumning oila a’zolari bilan doimiy aloqada bo‘lib turibdi. Ular jasadni vatanga qaytarish jarayonida zarur barcha tashkiliy va huquqiy yordamni ko‘rsatishini ma’lum qilishdi.
Mutaxassislar ta’kidlashicha, xorijda mehnat qilayotgan yurtdoshlarimizning xavfsizligi masalasi juda muhim. Shu bois mehnat muhojirlari xavfsizlik qoidalariga rioya qilishi va ish beruvchi tashkilotlar tomonidan ish sharoitlari doimiy nazoratda bo‘lishi zarurligi alohida qayd etilmoqda.
“Zamin”ni Telegramʻda oʻqing!
