Samarqand shahrida inson aqlini lol qoldiradigan holat sodir bo‘ldi. Erkak o‘zining qaynuka pochchasini o‘ldirib, uni qopqa solib qabristonga yashirishga urindi. Ammo mahalla raislarining hushyorligi va tezkor harakati oqibatida jinoyat fosh etildi, deb xabar berdi mahalliy manbalar.
Mahalla raislarining kuzatuvi jinoyatni ochdi
Ma’lumotlarga ko‘ra, 24 avgust kuni soat 05:30 atrofida “Navbog‘chiyon” va “Bo‘ston” mahallalari raislari hududni aylanib chiqish jarayonida ikki shaxs — erkak va ayolning shubhali harakatlarini payqab qolgan. Ular bolalar aravachasida qabriston tomon yo‘l olayotgan bo‘lgan. Biroq aravachada bola emas, balki yelim idishlar orasiga yashirilgan qop borligi aniqlandi. Keyinroq ma’lum bo‘lishicha, qop ichida o‘ldirilgan odam jasadi bo‘lgan.
Mahalla raisi Adham Rahimov voqeani eslab shunday deydi:
“Baklajkalarning orasida shubhali narsa borligini ko‘rib, ularning orqasidan bordim. Qabriston oldida ularni to‘xtatdim. Qarasam, fuqaro o‘z pochchasini o‘ldirib, jasadni ko‘mish niyatida harakat qilgan ekan. Darhol ichki ishlar xodimlariga xabar berdim. Ular esa jinoyatni fosh qildi”.
Jinoyatchi “o‘limni yashirish” bahonasi ortida to‘xtalib qoldi
Tekshiruv jarayonida erkak o‘z qilmishini yashirish uchun “pochcham uyimizga kelgandi, o‘zi o‘lib qoldi. Shuning uchun qabristonga ko‘mmoqchi bo‘ldik”, degan bahonani keltirgan. Biroq voqea joyiga yetib kelgan ichki ishlar xodimlari voqeaning qotillik ekanini aniqladi.
Qahramonlik uchun taqdirlash
Mazkur voqeadan so‘ng Ichki ishlar vazirligi mahalla raislari Adham Rahimov va A’zam Ostonqulovning hushyorligi va jasoratini alohida ta’kidlab, ularni ko‘krak nishonlari bilan taqdirladi. Chunki aynan ularning e’tibori va tezkor xabardorligi oqibatida qotillik yashirin qolmay, o‘z vaqtida fosh etildi.
“Zamin”ni Telegramʻda oʻqing!
