So‘nggi kunlarda ijtimoiy tarmoqlarda keng tarqalgan videolavha katta bahslarga sabab bo‘ldi. Kadrlarda go‘yo Surxondaryo viloyatidagi paxta qabul punktida ichida odamlar bo‘lgan paxta arobasi tarozidan o‘tkazilayotgandek ko‘rinish aks etgan. Ko‘plab fuqarolar ushbu holatdan iztirobga tushib, rasmiy izoh talab qilishdi.
Biroq viloyat hokimligi matbuot xizmati videoning Surxondaryo bilan mutlaqo bog‘liq emasligini ma’lum qildi. Hokimlik bayonotida aytilishicha, ushbu lavha ilgari, ya’ni 2019 yilda ham internetda tarqalgan va o‘sha vaqtning o‘zidayoq rad etilgan. O'sha paytda berilgan rasmiy munosabatda voqea Surxondaryo hududida emasligi alohida ta’kidlangan.
Hokimlik jamoatchilikka murojaat qilib, tekshirilmagan va asossiz ma’lumotlarga ishonmaslikka chaqirdi. Rasmiylarning fikricha, bu kabi soxta xabarlar aholini chalg‘itishi, salbiy kayfiyat uyg‘otishi va jamiyatda ishonchsizlik muhitini kuchaytirishi mumkin. Shu bilan birga, qonunchilikka muvofiq, yolg‘on axborot tarqatish javobgarlikka olib kelishi ham eslatib o‘tildi.
Mutaxassislar ta’kidlashicha, axborot texnologiyalari jadal rivojlanayotgan bugungi davrda har bir foydalanuvchi ma’lumot manbasini tekshirishi va faqat ishonchli xabarlarga suyanishini o‘rganishi zarur. Bu nafaqat shaxsiy mas’uliyat, balki butun jamiyat oldidagi burch sifatida ham qaralishi lozim.
“Zamin”ni Telegramʻda oʻqing!
