29-sentabr kuni bo‘lib o‘tishi rejalashtirilgan Mubashshir Ahmad (Alisher Tursunov) ishi bo‘yicha sud majlisi yana keyinga qoldirildi. Toshkent shahar sudlari matbuot xizmati sud sanasi 2-oktabr, 16:00 ga ko‘chirilganini tasdiqladi, ammo rasmiy sabab ochiqlanmadi, deb yozadi UZ24.uz.
Himoyachi Abdulloh Sodiqga ko‘ra, rasmiylar bu kechikishni sudyaning kasalligi bilan izohlagan.
Eslatib o‘tamiz, bungacha ham 22-sentabrga belgilangan majlis boshqa sud ishi sababli 29-sentabrga surilgandi.
Davlat ayblovchisi Tursunovni JKning 156-, 244−1- va 244−3-moddalari bo‘yicha aybdor deb topib, unga 7 yil qamoq jazosi va 150 baravar BHM miqdorida jarima belgilashni so‘ragan.
Himoya tomoni va mustaqil advokatlar esa ayrim moddalarni olib tashlash va qolganini JKning 70-moddasi asosida bekor qilishni talab qilgan.
Dastlab, ayblanuvchining so‘nggi so‘zi va hukm 22 yoki 29-sentabrda e’lon qilinishi kerak edi. Endilikda sud 2-oktabrda davom etadi.
“Zamin”ni Telegramʻda oʻqing!
