4 yoshli qizcha yurib ketayotgan avtomobil eshigidan yiqilib tushdi
Toshkentda sodir bo‘lgan voqea ijtimoiy tarmoqlarda keng muhokamaga sabab bo‘ldi. Internetda tarqalgan videolarda yurib ketayotgan avtomobilning orqa eshigi bir zumda ochilib, undan kichik qizaloq yiqilib tushayotgani aks etgan. Bu holat ko‘pchilikni hushyorlikka chaqirdi.
Zamin.uz xabar berishicha, voqea 9 oktyabr kuni soat 08:30 larda Sergeli tumanida, 10-sonli poliklinika qarshisida ro‘y bergan. VAZ-2115 rusumli avtomobilni 1964 yilda tug‘ilgan B.I. boshqarib kelayotgan bo‘lgan. Svetafor yashil yonishi bilan harakat boshlaganida, orqa chap eshikda o‘tirgan 2021 yilda tug‘ilgan qizaloq eshikni tasodifan ochib yuborgan va yo‘lga yiqilib tushgan.
Bobo – “Nabiramni har kuni bog‘chaga olib boraman”
Ma’lumotlarga ko‘ra, bola bilan uning bobosi birga bo‘lgan. Katta yoshli erkak qizchasini bog‘chaga olib ketayotgan paytda ushbu noxush voqea sodir bo‘lgan. Uning aytishicha, har kuni ertalab soat 8:00–8:30 oralig‘ida bolani bog‘chaga olib boradi.
“Oynani yop deganimda u eshikni ochib yuboribdi. Bir zumda odamlar ‘qizingiz tushdi!’ deb baqirdi. Orqamga qarasam, nabira yo‘q. Shoshilib orqaga qaytdim. Bir kishi uni ko‘tarib turgan ekan. Yaxshiyamki, hech qaeriga zarar yetmagan. Hozir ahvoli yaxshi”, — deydi qizchaning bobosi.
Bolaning ahvoli yaxshi, tergov ishlari davom etmoqda
Yiqilish vaqtida bola mashinaning orqa qismida bo‘lgani va tezlik katta emasligi oqibatlarni yengillashtirgan. Guvohlar ma’lumoticha, bola yerga yiqilgandan keyin tezda yordam ko‘rsatilgan, shifokorlarga murojaat qilish zarurati tug‘ilmagan.
Toshkent shahar Yo‘l harakati xavfsizligi boshqarmasi holat yuzasidan rasmiy ma’lumot berdi. Ta’kidlanishicha, hozirgi vaqtda IIBB Yo‘l harakati xavfsizligi boshqarmasi tomonidan surishtiruv ishlari olib borilmoqda. Mutaxassislar bunday vaziyatlarda bolalarni orqa o‘rindiqda maxsus bolalar o‘tirgichi (avtokreslo)da o‘tkazish va eshiklar blokirovkasi faol holatda bo‘lishi zarurligini eslatdi.
“Zamin”ni Telegramʻda oʻqing!
