O‘zbekiston bojxona organlari huquqni muhofaza qiluvchi idoralar bilan hamkorlikda mamlakatda faoliyat yuritgan eng yirik narkotarmoqni fosh etdi. Rasmiy ma’lumotlarga ko‘ra, “Deadpool” nomli Telegram narkodo‘kon 2017 yildan buyon faoliyat yuritib kelgan va 4 mingdan ortiq obunachiga ega bo‘lgan.
Joriy yilning avgust–sentyabr oylarida o‘tkazilgan ko‘p bosqichli tezkor operatsiyalar chog‘ida mazkur tarmoqning yetakchi tarqatuvchilari qo‘lga olindi.
31 avgust kuni Andijon viloyatida qirg‘iz-o‘zbek chegarasi yaqinida 602 gramm “alfa-PVP” sintetik moddasini qabul qilib olayotgan fuqaro ushlandi. Tergov jarayonida u 2023 yildan buyon narkodo‘kon ishchisi ekanini va uch yil ichida 50 kilogrammga yaqin modda tarqatganini ma’lum qildi.
10 sentyabr kuni Toshkent viloyatida o‘tkazilgan “nazorat ostida yetkazib berish” amaliyotida yana ikki fuqaro 492 gramm “klefedron”ni qabul qilayotgan paytda qo‘lga olindi. Ular yarim yil davomida har biri oyiga yarim kilogrammga yaqin sintetik modda tarqatib kelganini tan oldi.
Tergov ma’lumotlariga ko‘ra, ushbu yetakchi tarqatuvchilarning har biriga bog‘liq kamida o‘n nafar mayda tarqatuvchi — “zakladchik” bo‘lgan. Ular moddalarni asosan Toshkent va Chirchiq atrofidagi bog‘lar hamda ta’lim muassasalari yaqinida yashirish orqali tarqatishgan.
Hozirda bojxona organlari tomonidan jinoyat ishi qo‘zg‘atilgan, tergov va tezkor tadbirlar davom etmoqda.
“Zamin”ni Telegramʻda oʻqing!
