Toshkent shahri Bektemir tumanidagi 290-maktab hududida 4-oktabr kuni soat 16:20 atrofida ikki o‘quvchi o‘rtasida janjal sodir bo‘ldi, deb UPL.uz xabar berdi.
Ma’lumotga ko‘ra, 9-sinfda o‘qiyotgan, 2010-yilda tug‘ilgan 15 yoshli o‘quvchi va 3-sinfda o‘qiyotgan, 2016-yilda tug‘ilgan 9 yoshli bola og‘zaki tortishuvga kirishgan. Tortishuv chog‘ida katta yoshli o‘quvchi velosipedga zarba bergan. Velosipedda harakatlanayotgan bola yiqilib, yuziga jiddiy shikast yetkazgan.
Sud-tibbiy ekspertiza natijasiga ko‘ra, bolaning o‘ng lab qismi yirtilgan, ikkinchi tishi to‘liq, birinchi tishi esa qisman chiqib ketgan. Shuningdek, peshonasi, chap yoni, yelkasi va qo‘llarida urilish va yumshoq to‘qimalar jarohati aniqlangan. Shikastlar yengil deb baholangan.
Hozirda Bektemir tuman IIB xodimlari tomonidan tergovoldi surishtiruv ishlari olib borilmoqda. 15 yoshli bolaning onasiga nisbatan O‘zbekiston Respublikasi Ma’muriy javobgarlik to‘g‘risidagi kodeksning bolalarni tarbiyalash bo‘yicha majburiyatlarni bajarmaslik moddasi bo‘yicha bayonnoma tuzilgan.
Shuningdek, maktab ma’muriyati va ota-onalar bilan profilaktik tushuntirish ishlari olib borilib, bu kabi holatlarning oldini olish choralariga kelishilgan.
“Zamin”ni Telegramʻda oʻqing!
