Sirdaryo viloyatining Oqoltin tumanida joylashgan “Shodlik” nomli xususiy bolalar bog‘chasida noxush holat ro‘y berdi. Ijtimoiy tarmoqlarda tarqalgan videoda ikki nafar tarbiyachi bir bolani yig‘lab, kechirim so‘rashga majburlayotgani aks etgan. Bu holat jamoatchilikda katta norozilik uyg‘otdi, deb xabar berdi idoralar manbalari.
Viloyat Maktabgacha va maktab ta’limi boshqarmasi ma’lumot berishicha, voqea vaqtida tarbiyachilardan biri — N.A. — bolaga nisbatan noo‘rin so‘zlar ishlatgan va pedagog etikasiga zid xatti-harakat sodir etgan. Bu holat bolalar huquqlari va tarbiya jarayonidagi insoniy munosabatlar me’yorlarini buzish sifatida baholandi.
Tekshiruv natijasida ikki nafar tarbiyachi bilan mehnat shartnomasi darhol bekor qilindi. Shuningdek, tashkilot rahbariyatiga nisbatan ham intizomiy chora ko‘rildi.
Boshqarma bayonotida ta’kidlanishicha, bu holat maktabgacha ta’lim tizimida pedagoglarning axloqiy mas’uliyati va bolalar bilan muloqot madaniyati bo‘yicha qo‘shimcha chora-tadbirlarni joriy etish zarurligini ko‘rsatdi.
Hozirda “Shodlik” bog‘chasida maxsus komissiya tomonidan ichki tekshiruv o‘tkazilmoqda. Mutasaddilar ta’kidlaganidek, bolalarning sha’ni va ruhiy holatiga ta’sir qiluvchi har qanday xatti-harakatga yo‘l qo‘yilmaydi, bunday holatlar keskin nazoratga olinadi.
“Zamin”ni Telegramʻda oʻqing!
