Samarqandda joriy yil may oyida yuz bergan va yetti insonning hayotiga nuqta qo‘ygan portlash ishi bo‘yicha sud hukmi e’lon qilindi.
Tergov ma’lumotlariga ko‘ra, fojea Samarqand shahridagi xususiy uyda sodir bo‘lgan. Portlash oqibatida bir oilaning yetti a’zosi halok bo‘lgan, bir necha uy va qurilmalarga katta zarar yetgan.
Tekshiruv jarayonida ma’lum bo‘lishicha, portlashga sabab bo‘lgan gaz tarmog‘i loyiha hujjatlarisiz va xavfsizlik talablariga zid holda o‘rnatilgan. Eng og‘riqlisi shundaki — xonadon egalari bu holat haqida 11 marta tegishli tashkilotlarga murojaat qilgan, ammo ularning birortasiga javob bermaganlar.
Shunday qilib, “Samarqand hudud gaz ta’minoti” korxonasi xodimlarining loqaydligi va mas’uliyatsizligi tufayli gaz oqimi markaziy oqova qudug‘iga siznib, chaqnash oqibatida kuchli portlash sodir bo‘lgan.
Fojea nafaqat bir oilaning hayotini barbod qildi, balki butun mahallada chuqur iz qoldirdi. Ko‘pchilik hali ham o‘sha tunni yodga olarkan, adolat tiklanishini kutib yashaganini aytib o‘tdi.
Sud jarayonida aniqlanishicha, korxonaning to‘rt nafar mas’ul xodimi jinoyatga bevosita aloqador bo‘lgan. Ularga nisbatan Jinoyat kodeksining 116-moddasi 4-qismi “a” va “b” bandlari asosida ayblov qo‘yilgan. Sud har biriga yetti yil muddatga ozodlikdan mahrum etish jazosini tayinladi.
Shu bilan birga, sud qaroriga ko‘ra, “Samarqand gaz ta’minoti” korxonasi fuqarolar oldidagi moddiy javobgarlikni ham zimmasiga oladi. Korxonadan portlash oqibatida zarar ko‘rgan fuqarolar foydasiga qariyb 6 milliard so‘m undiriladi.
Bu ish nafaqat bir fojeaning yopilishi, balki mas’uliyatsizlikning javobi sifatida baholanmoqda. Chunki har bir murojaat, har bir signal o‘z vaqtida eshitilganida, bu yetti inson bugun tirik bo‘lishi mumkin edi.
Muttaxassislar ta’kidlamoqda: gaz tizimidagi har bir xato — inson hayoti bilan bog‘liq. Bunday voqealar takrorlanmasligi uchun tizimda nafaqat texnik, balki insonparvarlik nazorati ham kuchaytirilishi zarur.
“Zamin”ni Telegramʻda oʻqing!
