Toshkentda Telegram orqali sintetik giyohvand moddalar sotish bilan shug‘ullangan jinoiy guruh fosh etildi, deb xabar berdi IIBB matbuot xizmati.
Ma’lum qilinishicha, huquq-tartibot organlari tomonidan Yunusobod va Mirobod tumanlarida o‘tkazilgan tezkor tadbirlar natijasida gumonlanuvchilar qo‘lga olingan. Ulardan jami 109 gramm sintetik giyohvand modda aniqlanib, daliliy ashyo sifatida musodara qilingan.
Tergov jarayonida ma’lum bo‘lishicha, guruh Telegram orqali “do‘kon” ochib, buyurtmalarni qabul qilish, moddalarni “joylashtirish” va kuryerlar orqali yetkazib berish tizimini yo‘lga qo‘ygan. Ular faoliyatini butunlay internet orqali amalga oshirgan.
Olib borilgan harakatlar natijasida jinoiy tarmoqning faoliyatiga chek qo‘yildi. Tarqatishga mo‘ljallangan 545 dona sintetik modda va taxminan 131 million so‘mlik noqonuniy mahsulot musodara qilindi.
Hozirda mazkur holat bo‘yicha Jinoyat kodeksining 273-moddasi (“giyohvand moddalarni noqonuniy tayyorlash va tarqatish”) bilan jinoyat ishi qo‘zg‘atilgan. Gumonlanuvchilar qamoqqa olingan, tergov harakatlari davom etmoqda.
Toshkent shahar IIBB jinoiy tarmoqning barcha bog‘lanishlarini aniqlash va tarqatish zanjirini to‘liq yo‘q qilish bo‘yicha ish olib bormoqda.
“Zamin”ni Telegramʻda oʻqing!
