Tarmoqlarda yana shov-shuv — logoped Dilorom Jabborova bolaga baqirib, uni tajovuzkorlikka undayotgani aks etgan video tarqaldi.
Kadrlarda mutaxassis boladan narsalarni uloqtirishni talab qiladi, “latta bo‘lma, kuchli bo‘l” deb baqiradi. Unga ko‘ra, bu usul “xarakterni mustahkamlaydi”. Shu bilan birga, u bolaga “agar eshikni yop deyishsa, derazadan kir”, deb tushuntiradi — go‘yo itoatsizlik orqali “kuchli shaxs” tarbiyalanardi.
Bu holat jamoatchilikda katta norozilik uyg‘otdi. Ko‘pchilik “bu psixologiya yoki logopediya emas, shafqatsizlik” deb baholadi.
Eslatib o‘tamiz, 2024 yilda ham Jabborova shunga o‘xshash “davolash” usullari bilan tanilgandi. Uning mashg‘ulotlarida baqirish, mot qilish, shamlar va hatto shaxmat toshlaridan foydalanilgani uchun jinoyat ishi qo‘zg‘atilgandi. Bolalar ombudsmani va ekspertlar uning amaliyotida jismoniy va ruhiy zo‘ravonlik alomatlarini aniqlashgan.
Biroq, ish tugatilganidan so‘ng u faoliyatini to‘xtatmadi. 2025 yilda u Namanganda “Ovoz akademiyasi” nomli markaz ochdi, keyin Buxoroda ham shunday filial tashkil etish niyatini bildirgandi.
Bolalar ombudsmani idorasi joriy yil aprelida Bosh prokuraturaga qayta murojaat qildi. Shundan so‘ng Yunusobod tumani prokuraturasi avval yopilgan jinoyat ishini qayta tikladi.
Hozirda Dilorom Jabborovaga nisbatan tergov ishlari qayta boshlangan.
Mutaxassislar ta’kidlamoqda: “Duduqlanish — bu sabr va professional yondashuvni talab etadigan holat. Bolani baqirish va tahqirlash orqali 'davolash' — na ilm, na axloqqa to‘g‘ri keladi”.
“Zamin”ni Telegramʻda oʻqing!
