Qurilish ishlarini loyihalashga ixtisoslashgan mas’uliyati cheklangan jamiyatning (MCHJ) arxitektori, Muzrabot tumanida yashovchi fuqaroning ishonchiga kirib, uning noturar joy binosi bo‘yicha hujjatlarni "muammosiz hal etib berish" bahonasida 17 million so‘m pul talab qilgan.
Davlat xavfsizlik xizmati va ichki ishlar organlari tomonidan o‘tkazilgan tezkor tadbir davomida, arxitektur mutaxassis talab qilingan mablag‘ni olgan vaqtda ashyoviy dalillar bilan ushlangan.
Tezkor choralar davom ettirilib, arxitektor mazkur pulning 1 million so‘mini tuman qurilish va uy-joy kommunal xo‘jaligi bo‘limi rahbariga berishini bildirgan. Tez orada, boshliq ham ushbu pora pulni olgan paytda qo‘lga olingan.
Hozirda har ikki shaxsga nisbatan jinoyat ishi qo‘zg‘atilib, tergov ishlari olib borilmoqda. Mazkur holat qurilish sohasidagi shaffoflik va mas’uliyatning yanada kuchaytirilishini talab qilayotganini yana bir bor ko‘rsatib turibdi.
