Ohangaronda qamoqdan qochgan mahkum 3‑sinf qizni zo‘rladi

Toshkent viloyati, Ohangaron tumanida 16-oktyabr kuni manzil koloniyasidan qochgan 1994-yilda tug‘ilgan mahkum maktabdan qaytayotgan 3‑sinf o‘quvchisini zo‘rlagan, deb Uz24 xabar berdi.

Viloyat IIBB ma’lumotni tasdiqladi va hozirda jinoyat ishi bo‘yicha tergov harakatlari olib borilmoqda.

Ma’lum bo‘lishicha, 31 yoshli mahkumga nisbatan Jinoyat kodeksining 119‑moddasi 4‑qismi (jinsiy ehtiyojni zo‘rlik ishlatib g‘ayritabiiy usulda qondirish) bo‘yicha jinoyat ishi qo‘zg‘atilgan.

Ushbu shaxs huquqni muhofaza qiluvchi organlar tomonidan protsessual tartibda ushlangan va unga nisbatan “qamoq” ehtiyot chorasi qo‘llanilgan.

Ma’lumotlarga ko‘ra, mahkum avval ham jinsiy jinoyat uchun sudlangan — u 2018-yilda Farg‘ona viloyatida Jinoyat kodeksining 118‑moddasi (nomusga tegish) bo‘yicha 16-yilga ozodlikdan mahrum etilgan.

2024-yilda sud qarori bilan jazoning qolgan 9-yil 2 oy qismini o‘tash uchun manzil koloniyasiga o‘tkazilgan, ammo u yerdan qochib ketgan.

Qonunga ko‘ra, 14 yoshga to‘lmagan shaxsga nisbatan jinsiy zo‘rlik ishlatish jinoyati uchun 15-yildan 20-yilgacha ozodlikdan mahrum qilish jazosi belgilangan.