Turkiyaning Kapadokiya aeroportida o‘tkazilgan operatsiya davomida xamir va go‘sht maydalagichlar ichiga yashirilgan 61 kilogramm 121 gramm oltin topildi, deb Uz24.uz xabar berdi. Hodisaga aloqador olti kishi hibsga olingan bo‘lib, ulardan besh nafari o‘zbekistonlik ekani ma’lum bo‘ldi.
Politsiyaning kontrabanda va uyushgan jinoyatchilikka qarshi kurash bo‘limi xodimlari kelib tushgan ma’lumot asosida aeroportda tekshiruv o‘tkazgan. Samolyot orqali kelgan 6 nafar shaxsning chemodanlari skaner orqali ko‘rib chiqilgan va xamir hamda go‘sht maydalagichlar shubhali deb topilgan.
Qurilmalardan 24 karatli 61 kg 121 gramm oltin aniqlangan. Oltinning bozor qiymati taxminan 350 million turk lirasi (ya’ni 11 million dollar yoki 1,37 trillion so‘m) deb baholanmoqda.
Hozirda kontrabanda yo‘li bilan olib kirilgan oltin musodara qilingan, 6 gumondor politsiya so‘rog‘idan so‘ng sud binosiga jo‘natilgan. Turkiya huquqni muhofaza qiluvchi organlari hodisa yuzasidan jinoyat ishi qo‘zg‘atgan.
“Zamin”ni Telegramʻda oʻqing!
