Toshkent shahri Yunusobod tumanida joylashgan “Magnat” xususiy bog‘chasida 3 yoshli bolaning yelkasi sindi.
Bolaning onasi ma’lum qilishicha, voqea 21 oktyabr kuni sodir bo‘lgan. U har kunigidek farzandini olish uchun bog‘chaga kelganida, bolasining holatida nimadir noto‘g‘rilikni payqagan.
“Oddatda u meni ko‘rib yugurib kelardi. Bu safar esa sust qadamlar bilan chiqdi. Quchoqlab olganimda qattiq yig‘lab yubordi. Keyin qo‘lini ko‘tarolmasligini ko‘rib, shoshilib shifokorga olib bordim. Rentgen tekshiruvida yelkasi singani ma’lum bo‘ldi”, — deydi ona.
Ona aytishicha, bog‘cha xodimlari avval voqeani yashirishga uringan. Telegram orqali berilgan savollarga “boshqa bolalar ko‘rpa yig‘ish chog‘ida ustidan bosib olgan, hech narsa bo‘lmagan”, degan javob qaytarilgan.
Bog‘cha ma’muriyatining izohiga ko‘ra, bolani tarbiyachi emas, balki boshqa bolalar ko‘rpa ostida o‘ynayotgan paytda bosib olgan. Ular bu holatni “tarbiyachi bosdi” deb bola noto‘g‘ri tushungan bo‘lishi mumkinligini aytishgan.
Hodisa bo‘yicha tarbiyachiga intizomiy chora — “hayfsan” berilgan. Bog‘cha rahbari bolaning sog‘lig‘ini tiklash uchun barcha xarajatlarni qoplashga tayyorligini bildirgan, ammo oila bu taklifni rad etgan.
Ayni vaqtda Maktabgacha va maktab ta’limi vazirligi voqea yuzasidan hali rasmiy izoh bermagan. Mutaxassislar bu holat xususiy bog‘chalardagi nazorat tizimini kuchaytirish zarurligini yana bir bor ko‘rsatdi.
“Zamin”ni Telegramʻda oʻqing!
