Toshkent viloyatida chegaradan chiqib ketayotgan ayolning chaqaloq tagligi ichida qiymati 133 million so‘mga teng oltin quymalar topildi, deb xabar berdi Bojxona qo‘mitasi.
Ma’lumotlarga ko‘ra, “Yallama” chegara postida fuqaroning yuklari tekshirilganda, ikki dona, umumiy og‘irligi 111 gramm bo‘lgan oltin quymalar aniqlangan. Ular maxsus ravishda chaqaloq tagligi ichiga yashirilgani ma’lum bo‘ldi.
Tekshiruv natijasida oltin musodara qilindi. Hozirda bojxona organlari tomonidan surishtiruv ishlari olib borilmoqda.
Rasmiylar eslatganidek, amaldagi qonunchilikka ko‘ra, fuqarolar 65 grammgacha bo‘lgan oltindan yasalgan tayyor zargarlik buyumlarini deklaratsiyasiz olib chiqishlari mumkin. Belgilangan miqdordan ortiq mahsulot esa majburiy deklaratsiya asosida rasmiylashtirilishi lozim.
Bojxona xodimlari ushbu holat orqali chegaradan noqonuniy yo‘l bilan qimmatbaho metallar olib o‘tish urinishlariga qarshi kurash yanada kuchaytirilishini ma’lum qilmoqda.
“Zamin”ni Telegramʻda oʻqing!
