Qashqadaryoda bir ota o‘zining aliment majburiyatini noodatiy tarzda ado etdi — u farzandi uchun belgilangan to‘lov o‘rniga undiruvchiga 6 sotixli hovlini rasman topshirdi.
Ma’lumotlarga ko‘ra, Koson tumanlararo sudi qarzdordan farzandi balogat yoshiga yetguncha moddiy ta’minotni ta’minlashni belgilagan edi. Ammo to‘lovlar o‘z vaqtida amalga oshirilmagani sababli qarzdorlik miqdori 9 million so‘mgacha ortdi.
Majburiy ijro byurosi xodimlari olib borgan chora-tadbirlardan so‘ng, ota qonuniy majburiyatini bajarish zarurligini tan oldi va vaziyatga insonparvarlik bilan yondashdi.
Shu tariqa, 11 noyabr kuni N.Qo‘ziboyev aliment o‘rniga farzandining manfaati uchun o‘zining 6 sotixli uy-joyini berishga qaror qildi. Hujjatlar rasmiylashtirilib, ijro ishi to‘liq yakunlandi.
Mutaxassislar ta’kidlashicha, bu holat qonundagi majburiyatni bajarish bilan birga, ota tomonidan farzandiga nisbatan mas’uliyatli munosabatning namunasi bo‘ldi.
“Zamin”ni Telegramʻda oʻqing!
