Toshkentning Bektemir tumanida bir necha avtomobildan yirik miqdorda pul o‘g‘irlagan shaxs qo‘lga olindi. Hodisa haqida shahar Ichki ishlar bosh boshqarmasi ma’lumot berdi.
Dastlab, gumonlanuvchi Qo‘yliq dehqon bozori atrofidagi Nexia-2'ni qaychi yordamida ochib, salon va yukxonani titkilagan. U yerdan qariyb 76 million so‘m topib, o‘g‘irlangan pul bilan izini yo‘qotgani aytilmoqda.
Gumonlanuvchining aytishicha, u atrofni kuzatib turgan paytda avtomobil egasi katta miqdordagi pulni tushirib olib ketganini ko‘rgan, mashinada signalizatsiya yo‘qligini bilib, vaziyatdan foydalangan.
Bir muddatdan keyin u yana o‘sha hududga qaytib, bu safar eshiklari ochiq qolgan Cobalt'dan 17 million so‘mni o‘g‘irlab ketgan. Avtomobil egasi telefonda gaplashib, mashinani qulflamay qoldirgani gumonlanuvchi uchun yana imkoniyat bo‘lgan.
Shundan so‘ng, u yana jinoyat sodir etish niyati bilan Bektemirga qaytganda, tezkor tadbir vaqtida qo‘lga olingan.
Mazkur holat yuzasidan Jinoyat kodeksining 169-moddasi — “O‘g‘rilik” bilan ish qo‘zg‘atilgan. Gumonlanuvchiga nisbatan qamoqqa olish ehtiyot chorasi qo‘llanilgan. Tergov jarayoni davom etmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
