Toshkentda ko‘p muhokama qilingan hovli firibgarligi ishi bo‘yicha sud hukmi chiqarildi, deb xabar berdi zamin.uz. Mirzo Ulug‘bek tuman sudida 1997 yilda tug‘ilgan Sh.R.ga nisbatan jinoyat ishi yakuniga yetkazildi.
Sud qaroriga ko‘ra, u Jinoyat kodeksining 168-moddasi 4-qismi “a” bandi — yirik miqdordagi firibgarlikda aybli deb topilib, 9 yilga ozodlikdan mahrum etildi. Jazo umumiy tartibdagi koloniyada o‘taladi.
Shu bilan birga, sud Sh.R.dan jabrlanuvchilar foydasiga umumiy hisobda qariyb 4,8 milliard so‘m zarar undirilishini belgiladi. Uyni olish bo‘yicha oldi-sotdi shartnomalarini bekor qilish masalasi esa fuqarolik tartibida ko‘rilishi kerakligi aytib o‘tildi.
Sud, shuningdek, ishda boshqa shaxslarga nisbatan ham jinoiy ish qo‘zg‘atish masalasini prokuraturaga yuborish haqida alohida ajrim chiqardi.
Nima bo‘lgan edi?
2024 yil avgust oyida Sh.R. to‘ydan oldingi “muammolarini hal qilish” bahonasida 1999 yilda tug‘ilgan qizning ishonchini suiiste'mol qilgan. Uysiz qolishdan qo‘rqib turgan qizga uyni vaqtincha garovga qo‘yish kerakligini aytgan, keyin esa undan foydalanib, hovlini bloger va tadbirkor Sanjar Karimovga (Sanjik) 240 ming dollarga sotib yuborgan.
Mazkur mojaro jamoatchilikda katta rezonans keltirgan va Sanjik ushbu uyni bolalar uyiga ehson qilishini aytgan edi. Biroq hujjatlar to‘liq rasmiylashmagani ma’lum qilingan.
Tergov jarayoni davomida Sh.R.ning boshqa fuqarolarga nisbatan ham bir qancha firibgarlik holatlariga aloqadorligi aniqlangan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
