Yo‘l chetidagi temir to‘siq mototsiklchini hayotini tugatdi

Toshkent viloyati Bo‘stonliq tumanida sodir bo‘lgan navbatdagi yo‘l fojiasi 43 yoshli mototsiklchi hayotiga nuqta qo‘ydi. YHXB ma’lumotiga ko‘ra, hodisa 23 noyabr kuni, taxminan soat 14:00 larda D012 “Bektemir–Chorbog‘” avtomobil yo‘lining 64-kilometrida yuz bergan.

Ma’lum bo‘lishicha, Toshkent shahrida yashovchi 1982 yilda tug‘ilgan G.A. Honda rusumli mototransportda “Chorbog‘–Toshkent” yo‘nalishi bo‘ylab yuqori tezlikda harakatlanib ketarkan, boshqaruvni yo‘qotib, yo‘l chetidagi temir to‘siqqa to‘qnashgan. Katta kuch bilan ro‘y bergan zarba ortidan haydovchi voqea joyida halok bo‘lgan.

Holat yuzasidan Bo‘stonliq tumani IIB Tergov bo‘limi tomonidan Jinoyat kodeksining 266-moddasi asosida ish qo‘zg‘atilgan. Tergov harakatlari davom etmoqda.