Toshkentda xavfli qo‘poruvchilik harakatlariga tayyorgarlik ko‘rgan, Qashqadaryoda tug‘ilgan 20 yoshli yigitga sud hukmi chiqarilib, u 6 yilga ozodlikdan mahrum etildi. Yakkasaroy tumani sudida ko‘rilgan ish bo‘yicha ayrim medialarda noto‘g‘ri talqinlar paydo bo‘lgani ortidan vaziyatga rasmiy idoralar izoh berdi.
Tergo‘v materiallariga ko‘ra, T.N. 2023 yildan internet orqali mustaqil ravishda diniy ma’lumotlar o‘rgana boshlagan va bu jarayonda ekstremistik va terroristik guruhlar g‘oyalarining ta’siriga tushgan. U mamlakatda olib borilayotgan islohotlarga qarshi chiqib, Suriyadagi “Tavhid va jihod katibasi” tashkiloti a’zolari bilan onlayn muloqotga kirishgan.
Shundan so‘ng u “Instagram” orqali Suriyadagi jangarilar bilan bog‘lanib, o‘z qarashlarini yanada keskinlashtirgan. Muhimi, u Suriyaga chiqib ketish va terrorchi guruhlar tarkibiga qo‘shilish yo‘llarini ham izlagan.
T.N. shu bilan birga tarmoqlarda taqiqlangan materiallarni saqlagan va tarqatgan, Toshkentda portlash uyushtirishga tayyorgarlik ko‘rgani ham aniqlangan.
Ayblovlar Jinoyat kodeksining terrorizm va ekstremizmga oid bir nechta moddalari bilan qo‘yilgan. Sanksiyalar og‘ir bo‘lishi mumkin bo‘lsa-da, sud yengillashtiruvchi holatlarni inobatga olgan holda 6 yillik jazo tayinladi.
Taraflarga hukmdan norozi bo‘lgan taqdirda apellyatsiya yoki kassatsiya shikoyati berish huquqi borligi tushuntirildi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
