Namangan va Jizzax viloyatlarida mahkumlarga tibbiy yordam o‘z vaqtida ko‘rsatilmagan holatlar jamoatchilik e’tiborini tortdi. O‘zbekiston Respublikasi Oliy Majlisi huzuridagi Inson huquqlari bo‘yicha vakil — Ombudsman ushbu holatlarni nazoratga oldi.
Ma’lum bo‘lishicha, Jizzax viloyatidagi 29-son manzil-koloniyada saqlanayotgan mahkum og‘ir ahvolda bo‘lishiga qaramay, ikki kun davomida to‘liq tibbiy yordam ola olmagan. U yuqori harorat va isitma bilan bir necha tibbiyot muassasalariga olib borilgan, ammo ayrim joylarda to‘lov yoki yo‘llanma talab qilingan, boshqalarida esa mutaxassis shifokor yo‘qligi sababli qabul qilinmagan. Keyinchalik unda o‘pka bilan bog‘liq og‘ir kasalliklar aniqlangan.
Ombudsman aralashuvidan so‘ng mahkum zudlik bilan shoshilinch tibbiy yordam markaziga yetkazilib, statsionar davolanishga joylashtirilgan. Zarur muolajalardan keyin dori-darmon bilan ta’minlangan.
Shuningdek, tekshiruvlar davomida Jizzax shahar vaqtincha saqlash hibsxonasida va Namangan viloyatidagi tergov hibsxonasida ham tibbiy yordam bilan bog‘liq muammolar aniqlangan. Xususan, homilador mahkuma tibbiy ko‘rik va davolanish masalasida murojaat qilgan.
Barcha holatlar Ombudsman tomonidan alohida nazoratga olinib, tegishli choralar ko‘rilmoqda. Huquqni himoya qilish organlari mahkumlarning sog‘lig‘i davlat himoyasida ekanini ta’kidlamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
