Tunda Toshkent aeroportida elektr o‘chib qoldi

6 yanvar kuni tungi soatlarda Toshkent xalqaro aeroportida qisqa muddatli elektr uzilishi kuzatildi. Bu haqda Uzbekistan Airports rasmiy axborot berdi.

Ma’lum qilinishicha, mahalliy vaqt bilan soat 02:28 da Qo‘yliq podstansiyasida yuzaga kelgan kichik texnik nosozlik sababli aeroport hududida elektr ta’minoti qisman uzilgan. Shu bilan birga, mazkur holat samolyotlarning qo‘nishi va uchishi jarayonlariga ta’sir ko‘rsatmagan.

Xabarga ko‘ra, aeroportning kelish va ketish zallari zaxira dizel generatorlar hamda UPS tizimlari orqali uzluksiz elektr energiyasi bilan ta’minlangan. Barcha xizmatlar odatiy tartibda ishlashda davom etgan.

Mutaxassislarning tezkor harakatlari natijasida soat 02:49 ga kelib elektr ta’minoti to‘liq tiklangan. Kompaniya tomonidan yo‘lovchilarga yetkazilgan har qanday vaqtinchalik noqulayliklar uchun uzr so‘ralgan va tushunish uchun minnatdorlik bildirilgan.

Rasmiylar vaziyat to‘liq nazorat ostida bo‘lganini ta’kidlamoqda.