Sherigi bilan ichib, mast holda sherigini pichoqlab ko‘ydi

Jizzax viloyatida qurilishda birga ishlab yurgan ikki tanish o‘rtasida ichkilikdan keyin janjal chiqib, og‘ir oqibatga olib keldi. Voqea 2025 yil 13 iyul kuni soat 17:00 atrofida Jizzax viloyati Sharof Rashidov tumanida sodir bo‘lgan.

Sud materiallariga ko‘ra, 1980 yilda Sirdaryo viloyatida tug‘ilgan erkak tanishi bilan spirtli ichimlik ichgan. Keyin ular o‘rtasida kelishmovchilik paydo bo‘lib, mojaro avj olgan. Janjal paytida u oshxona pichog‘i bilan tanishining qorin va ko‘krak sohalariga zarba berib, qasddan og‘ir tan jarohati yetkazgan.

Ish Jizzax viloyati jinoyat ishlari bo‘yicha Zardor tuman sudida ko‘rib chiqildi. Sudlanuvchi aybiga iqror bo‘lib, pushaymonligini aytgan va yengil jazo so‘ragan.

Sud jabrlanuvchi va guvohlar ko‘rsatmalari, ish hujjatlarini o‘rganib, ayblanuvchining 4 nafar farzandi borligi va mavsumiy ishchi ekanini ham inobatga oldi. Natijada u 3 yil muddatga ozodlikdan mahrum qilindi, jazoni umumiy tartibdagi koloniyada o‘taydi.