YPXni masxaralagan video muallifi 7 sutkaga qamaldi

Surxondaryo viloyatida yo‘l-patrul xizmati xodimlarini obro‘sizlantiruvchi video tasvirga olib, uni ijtimoiy tarmoqlarda tarqatgan fuqaroga nisbatan qat’iy chora ko‘rildi. Bu haqda Davlat yo‘l harakati xavfsizligi xizmati matbuot xizmati ma’lum qildi.

Ma’lumotlarga ko‘ra, Denov tumanida yashovchi fuqaro 2026 yil 9 yanvar kuni xizmat vazifasini bajarayotgan YPX xodimlarini videoga olgan. Keyinchalik u mazkur lavhalarga haqoratli ovoz va izohlarni montaj qilib, shaxsiy Instagram sahifasiga joylashtirgan. Natijada ushbu video inspektorlarning sha’ni va obro‘siga putur yetkazgan.

Xodimlarning aytishicha, video qisqa vaqt ichida 2,5 million martadan ortiq tomosha qilingan. Izohlar esa haqorat va haqqoratlarga to‘lgan bo‘lib, bu holat jamoatchilik orasida salbiy kayfiyatni kuchaytirgan. “Izohlarda men haqimda ham, ota-onam haqida ham og‘ir so‘zlar qoldirilgan. Qattiqroq chora ko‘rilsa, bu boshqalarga ham saboq bo‘ladi”, degan inspektorlardan biri.

Huquqbuzar sud jarayonida aybini to‘liq tan olgan. U videoni faqat obunachilar sonini oshirish maqsadida joylashtirganini, qilgan ishidan pushaymon ekanini bildirgan.

Sud qaroriga ko‘ra, fuqaroga nisbatan Ma’muriy javobgarlik to‘g‘risidagi kodeksning huquqni muhofaza qiluvchi organlar xodimlarini obro‘sizlantirishga qaratilgan foto yoki video materiallarni tarqatishni nazarda tutuvchi moddasi bilan 7 sutka ma’muriy qamoq jazosi tayinlandi.

Aytish joiz, bu kabi holatlar avval ham kuzatilgan. Qashqadaryo viloyatida YPX inspektorini obro‘sizlantirish maqsadida videolar tarqatgan shaxs ham 7 sutkaga qamalgan edi. Shuningdek, Toshkent shahrida YPX xodimini avtomobil kapoti ustida sudrab ketgan yigitga nisbatan jinoyat ishi qo‘zg‘atilgan.

Bundan tashqari, Surxondaryoda yana bir holatda YPX inspektorlarini haqoratlab, videoni ijtimoiy tarmoqqa joylashtirgan haydovchi ayolga 4 sutka ma’muriy qamoq jazosi berilgan.

Mutaxassislar fuqarolarni ijtimoiy tarmoqlarda mas’uliyatli bo‘lishga, xizmat vazifasini bajarayotgan xodimlarni haqorat qilish yoki obro‘sizlantirish qonun oldida javobgarlikka olib kelishini unutmaslikka chaqirmoqda.