Jizzaxda kelin sepini MIB orqali oldi

Jizzax viloyatida ajrashuvdan keyin kelinlik sepini qaytarish bilan bog‘liq ish ijobiy hal bo‘ldi. Majburiy ijro byurosi (MIB) Mirzacho‘l tuman bo‘limiga Fuqarolik ishlari bo‘yicha sudning ijro hujjati kelib tushgan bo‘lib, unda fuqaro M.M. foydasiga 36 turdagi shaxsiy mol-mulk — kelinlik sarpolarini qaytarib berish belgilangan.

Ijro hujjati asosida davlat ijrochisi ish boshlab, qarzdor tomon bilan tushuntirish va muzokaralar o‘tkazgan. Shundan so‘ng belgilangan tartibda zarur ijro harakatlari amalga oshirilgan.

Xolislar ishtirokida hujjatda ko‘rsatilgan barcha 36 turdagi mol-mulk xatlovdan o‘tkazilib, undiruvchi — kelinga to‘liq topshirilgan.

MIB xodimlarining tezkor va qonuniy harakatlari natijasida fuqaro o‘zining qonuniy mulkini to‘liq qaytarib olishga muvaffaq bo‘ldi.