Samarqandda tunda yo‘l harakati qoidalarini qo‘pol ravishda buzgan Samarqanddagi Gentra va Onix haydovchi-yo‘lovchilari ma’muriy javobgarlikka tortildi. Bu haqda Samarqand viloyati YHHB matbuot xizmati xabar berdi.
Ma’lumotlarga ko‘ra, voqea shaharning Mirzo Ulug‘bek ko‘chasida sodir bo‘lgan. Yarim tunda katta yo‘lda svetofor qizil chirog‘ida to‘xtab turgan ikki mashinadan haydovchi va yo‘lovchilar tushib, musiqani baland qilib qo‘ygan holda raqsga tushgan. E’tiborli jihati — ular keyin yashil yonganda harakatni davom ettirib, keyingi svetoforda ham shu holatni yana takrorlagan.
Yo‘l harakati qoidalarini mensimagan besh nafar shaxsga nisbatan Samarqand shahar sudi tomonidan har biriga 3 sutka ma’muriy qamoq jazosi tayinlandi. Ikki avtomobil esa vaqtinchalik saqlash jarima maydonchasiga jo‘natildi.
Aybдорlardan birining so‘zlariga ko‘ra, ular “qizilda to‘xtab, musiqani baland qo‘yib o‘ynab qo‘yganini”, bu ish oqibati shunchagacha borishini kutmaganini aytgan. U “pushaymon” ekanini bildirib, boshqa haydovchilarga ham bunday qilmaslikni tavsiya qilgan: haydovchi sifatida yo‘lovchilarga bunday “sharoit” yaratib bermasligi, mashinadan tushishga yo‘l qo‘ymasligi kerakligini tan olgan. Qolganlar ham qilmishidan afsusda ekanini bildirgan.
Bu kabi holatlar avval ham muhokamalarga sabab bo‘lgan. Masalan, Andijonda qizilda to‘xtab, yo‘l o‘rtasida salomlashib olgan haydovchilar ortidan boshqa bir avtomobil haydovchisi katta miqdorda jarimaga tushib qolgani haqida xabarlar tarqalgan edi.
Qisqasi, yo‘l — sahna emas. Bir daqiqalik “kayfiyat” ba’zan uch sutkalik qattiq saboqqa aylanib ketadi.
“Zamin”ni Telegramʻda oʻqing!
