Jizzax viloyati Paxtakor tumanida yashagan oila turmushdagi kelishmovchiliklar sabab ajrashib ketgan. Shu ortidan ayol ota uyiga qizlarisiz qaytishga majbur bo‘lgani aytilmoqda. Ona esa farzandlarini sog‘inib, ularni olib ketish umidida bir necha bor sobiq turmush o‘rtog‘ining uyiga borgan, lekin har safar eshik oldidan qaytarilgan, hatto qizchalarni ko‘rishga ham ruxsat berilmagan.
Bu holatga chiday olmagan ona sudga murojaat qilgan. Sud qarori bilan bolalarni ona tarbiyasiga topshirish haqida ijro hujjati chiqarilib, ish MIBning tuman bo‘limi ish yurituviga kelib tushgan. Ijro harakatlari jarayonida esa qizchalar ataylab yashirilgani ma’lum bo‘lgani uchun rasmiy qidiruv e’lon qilingan.
Tezkor tadbirlar natijasida qizchalar Toshkent shahrida, amakisining uyida ekani aniqlangan. Qizaloqlar olib kelinib, onasi bag‘riga qaytarilgan. Bu voqea yana bir narsani eslatadi: bolalarni “baxs predmeti”ga aylantirish oson, lekin ularning ruhiyatini tiklash eng qiyin — shuning uchun bunday vaziyatlarda qonun ham, vijdon ham birinchi o‘rinda turishi kerak.
“Zamin”ni Telegramʻda oʻqing!
