Toshkent shahrida “Umra” ziyorati bilan bog‘liq firibgarlik holati aniqlanib, gumonlanuvchilar tezkor tadbirda qo‘lga olindi. Bosh prokuratura huzuridagi Departamentning Mirobod tumani bo‘limi va boshqa huquqni muhofaza qiluvchi organlar hamkorligida o‘tkazilgan tadbirda “A.A.” MCHJning norasmiy ishchisi A.A. hamda boshqa shaxslar fuqaro G.B. va uning ota-onasiga “viza” hujjatlarini tayyorlab, Saudiya Arabistoniga yuborishni va’da qilgani aytiladi.
Ma’lumotlarga ko‘ra, ular jami 3 150 AQSh dollari evaziga “Umra”ga yuborishni va’da qilib, oldindan bo‘nak sifatida 2 400 AQSh dollarini olgan vaqtida ashyoviy dalillar bilan ushlangan. Holat yuzasidan Jinoyat kodeksining 168-moddasi (firibgarlik) hamda 28, 211-moddalari (pora berish) alomatlari bilan jinoyat ishi qo‘zg‘atilgan.
Hozirda tergov harakatlari olib borilmoqda va ish tafsilotlariga huquqni muhofaza qiluvchi organlar tomonidan aniqlik kiritilishi kutilmoqda. Bunday vaziyatlar ko‘payayotgan bir paytda “Umra viza qilib beraman” degan takliflarga uchmaslik, rasmiy litsenziyasi bor tur-operator va hujjatlarni tekshirish — keyin afsus qilmaslikning eng oson yo‘li.
“Zamin”ni Telegramʻda oʻqing!
