"O‘zbekneftgaz" AJ qaramog‘idagi beshta quduqdan sanoat miqyosida tabiiy gaz oqimi olindi, deb kompaniya matbuot xizmati ma’lum qildi.
Qayd etilishicha, Qoraqalpog‘iston hududida yangi, yuqori bosimga ega gaz koni aniqlangan. Bundan tashqari, Qashqadaryo viloyatida uchta, Buxoro viloyatida esa bitta quduqdan ham sanoat ahamiyatiga molik gaz oqimi qayd etilgan.
Hozirda mazkur quduqlarda gazning debiti, ya’ni sutkalik hajmi hamda tarkibini aniqlash bo‘yicha tekshiruv ishlari olib borilmoqda. Mutaxassislar natijalarga tayanilgan holda keyingi ish rejalarini belgilashi aytilmoqda.
Kompaniyaning ta’kidlashicha, quduqlarni qayta ta’mirlash ishlari ham samara beryapti. Jumladan, Ustyurt hududida joylashgan va avval zaxiralari tugagan deb baholangan Shimoliy Berdaq konining 7 son qudug‘i ta’mirdan keyin qayta ishga tushirildi.
Natijada ushbu quduqdan yana sanoat miqyosida tabiiy gaz chiqarishga erishilgan. "O‘zbekneftgaz" bunday tadbirlar qazib chiqarish imkoniyatlarini kengaytirishga xizmat qilishini qayd etgan.
“Zamin”ni Telegramʻda oʻqing!
