Rossiyaning Sankt-Peterburg shahridagi Petroza vodskaya ko‘chasida 7 yoshli bola uyning yettinchi qavati karniziga chiqib qolgan. Qo‘shnilar uni xonaga qaytishga chaqirgan, ammo bola javob bermagan.
Oradan bir necha soniya o‘tib, u muvozanatni yo‘qotgan holda pastga qulagan. Voqea joyida bo‘lganlar bu holatni qo‘rquv bilan kuzatgani aytilmoqda.
Shu payt uy oldida ishlab turgan, O‘zbekistonda tug‘ilgan Xayrullo ismli erkak ochiq deraza yonida bolani avvalroq payqagan. U bola tashqariga chiqmoqchi bo‘layotganini anglab, yaqinlashib vaziyatni nazorat qila boshlagan.
Xabarga ko‘ra, bola boshi bilan pastga qulayotgan mahalda Xayrullo uni havoda ushlab qolgan. U bolani bag‘riga bosib, zarbaning og‘irligini kamaytirishga erishgan.
Shundan so‘ng u bolani ko‘p qavatli uy yo‘lagiga olib kirgan. Qo‘shnilar tez yordam chaqirguncha, Xayrullo bolani hushiga keltirish uchun harakat qilgan.
Ma’lum qilinishicha, bola tirik qolgan va hozir reanimatsiya bo‘limida. Shifokorlar uning ahvolini barqaror deb baholagan.
Xayrullo ham yengil tan jarohatlari olgan, biroq og‘ir shikastlar qayd etilmagan. Voqea ijtimoiy tarmoqlarda ham keng muhokama qilinmoqda.
“Zamin”ni Telegramʻda oʻqing!
