Toshkent shahrida iPhone mobil qurilmalarining noqonuniy aylanmasiga bog‘liq navbatdagi holatlar fosh etildi. Toshkent-AERO ixtisoslashtirilgan bojxona kompleksi matbuot xizmatiga ko‘ra, tezkor tekshiruvlar davomida jami 179 dona telefonning “qora bozor” orqali sotilishiga chek qo‘yilgan.
Ma’lum qilinishicha, Kontrabandaga qarshi kurash bo‘limi xodimlari Chilonzor tumanida bojxona rasmiylashtiruvidan o‘tmagan, noqonuniy yo‘llar bilan respublikaga olib kirilgan 255 million so‘mlik 102 dona iPhone “shartli xaridor”ga sotilayotgan vaqtda to‘xtatib qolgan.
Shuningdek, Shayxontohur tumani yaqinidagi savdo majmuasi atrofida 207 million 900 ming so‘mlik 77 dona telefon ham “shartli xaridor”ga taklif qilinayotgan paytda aniqlanib, sotuvga chiqarilishi oldi olingan.
Ayni paytda mazkur holatlar bo‘yicha bojxona organlari tomonidan surishtiruv ishlari olib borilayotgani ma’lum qilindi.
Xabarda qayd etilishicha, 2026 yil boshidan buyon mazkur kompleks bojxonachilari 35 ta holatda jami 1 milliard 727 million so‘mlik 377 dona uyali aloqa vositalarining noqonuniy aylanmasini bartaraf etgan.
“Zamin”ni Telegramʻda oʻqing!
