Bosh prokuratura ma’lum qilishicha, Uzbelas Performance avtoservisi rahbari Asadbek Jumayev ishtirok etgan videointervyu o‘rganib chiqilgan. Mazkur chiqish ijtimoiy tarmoqlarda muhokamalarga sabab bo‘lgani aytilmoqda.
Aniqlanishicha, Jinoyat ishlari bo‘yicha Toshkent shahar Mirzo Ulug‘bek tumani sudining 2026-yil 16-yanvardagi qaroriga ko‘ra, A.Jumayev Ma’muriy javobgarlik to‘g‘risidagi kodeksning 195-2-moddasi bilan javobgarlikka tortilgan. Unga bazaviy hisoblash miqdorining 20 baravari — 8,4 mln so‘m miqdorida jarima belgilangan.
Bosh prokuratura esa holatga qo‘shimcha huquqiy baho berish maqsadida 26-fevral kuni Toshkent shahar sudining jinoyat ishlari bo‘yicha sudlov hay’atiga protest kiritganini ma’lum qildi.
Ma’lumot uchun, 2026-yil yanvar oyida tarmoqlarda Toshkent shahri Shahrisabz ko‘chasida BMW rusumli ikki transport vositasi YPX xodimlarining to‘xtash ishorasiga bo‘ysunmasdan harakatlangani aks etgan video tarqalgan edi. Kadrlarda haydovchilardan biri inspektorni ko‘rganida tezlikni pasaytiradi, ammo to‘xtamasdan ketib qoladi, xodim esa mashina ortidan jezlini otgan holda qolib ketgani ko‘rinadi.
Bloger Malik Muhamedov Asadbek Jumayevdan intervyu olib, aynan shu voqea haqida fikrini so‘ragan. Jumayev esa mazkur holat uchun boshqalar 15 sutkaga qamalishi mumkinligini, ular esa jarima bilan “qutilib qolgani”ni aytgan.
“Zamin”ni Telegramʻda oʻqing!
