Yangi o'quv yilidan boshlab yurtimizda xotin qizlarning ta'lim olishi va ilmiy izlanishlarini rag'batlantirish bo'yicha muhim yangiliklar joriy etilmoqda. Xususan, maktabni tamomlab, davlat texnikumlariga o'qishga kirgan qizlar endilikda to'liq grant asosida tahsil olish imkoniyatiga ega bo'ladilar. Bu qadam yoshlarning kasbiy ko'nikmalarni egallashiga va kelajakda munosib ish topishiga katta yordam beradi.
Shuningdek, ijtimoiy himoyaga muhtoj oilalardagi xotin qizlar uchun ajratiladigan davlat granti kvotalari ikki baravarga oshirilishi rejalashtirilgan. Nufuzli xalqaro reytingdagi top 300 talik oliygohlar bilan hamkorlikda magistratura bosqichida o'qiyotgan talaba qizlarning kontrakt to'lovlari ham to'liq davlat hisobidan qoplab beriladi.
Bundan tashqari, xotin qizlarning innovatsion g'oyalarini ro'yobga chiqarish maqsadida har yili kamida 10 ta yo'nalish bo'yicha startap tanlovlari tashkil etiladi. Ushbu tanlovlarda g'olib chiqqan har bir loyiha muallifiga 500 million so'mgacha grant mablag'lari ajratiladi. Mazkur tashabbuslar mamlakatimizda xotin qizlarning jamiyatdagi o'rnini mustahkamlash va ularning intellektual salohiyatini yuzaga chiqarishga xizmat qiladi.
“Zamin”ni Telegramʻda oʻqing!
