Farg'ona tumani soliq inspeksiyasi bosh inspektori noqonuniy yo'llar bilan boylik orttirishga urinayotgan vaqtda huquqni muhofaza qiluvchi organlar tomonidan qo'lga olindi. Davlat xavfsizlik xizmati xabariga ko'ra, mansabdor shaxs o'z tanishlari orqali tuman hokimligi zaxirasidagi 10 gektar qishloq xo'jaligi yerini tadbirkorga olib bermoqchi bo'lgan.
Ma'lum bo'lishicha, soliqchi ushbu yer maydonini sayyohlik maskani qurish uchun ajratib berish hamda uning toifasini o'zgartirish evaziga tadbirkordan jami 101 ming dollar talab qilgan. DXX va Ichki ishlar vazirligining Namangan viloyati boshqarmalari hamkorligida o'tkazilgan tezkor tadbir davomida, gumonlanuvchi 20 ming dollar miqdoridagi pulni olayotgan vaqtda ashyoviy dalillar bilan ushlangan.
Hozirgi vaqtda mazkur holat yuzasidan Namangan viloyati prokuraturasi tomonidan Jinoyat kodeksining tegishli moddalari bilan jinoyat ishi qo'zg'atilgan. Tergov harakatlari davomida soliq inspektoriga nisbatan qamoqqa olish ehtiyot chorasi qo'llanilgan. Tergov jarayoni davom etmoqda.
“Zamin”ni Telegramʻda oʻqing!
