Toshkent shahrida korrupsiya fakti aniqlandi. Bu haqda Davlat xavfsizlik xizmati maʼlumot berdi.
Maʼlum qilishlaricha, DXXning Toshkent shahar boshqarmasi hamda poytaxt IIBB xodimlari hamkorlikda tezkor va maqsadli tadbir tashkil etdi. Tadbir davomida Qurilish va uy-joy kommunal xo‘jaligi vazirligi bosh mutaxassisi Toshkent shahridagi ko‘p qavatli uylarga xizmat ko‘rsatuvchi MCHJ rahbaridan 1 500 AQSH dollari pora olgan vaqtda ushlandi.
Qo‘lga olish jarayonida vazirlik bosh mutaxassisi qochishga uringan bo‘lsa-da, tezkor xodimlar uni darhol ushlab qoldi.
Tekshiruv maʼlumotlariga ko‘ra, u Yunusobod tumanidagi 6 ta uyga xizmat ko‘rsatish huquqini bir MCHJdan boshqa MCHJga o‘tkazishga oid uy-joy mulkdorlari imzolagan dalolatnomalarni “Mening uyim” platformasida ro‘yxatdan o‘tkazib berishni vaʼda qilgan. Shuning evaziga 2 200 AQSH dollari talab qilgan. U bu jarayonni o‘z mansabdor tanishlari orqali hal qilishni rejalashtirgan.
Hozirda bosh mutaxassisga nisbatan jinoyat ishi qo‘zg‘atilgan va tergov harakatlari faol davom etmoqda.
“Zamin”ni Telegramʻda oʻqing!
