Qo‘qon shahrida bank xodimi tomonidan sodir etilgan vahshiylik voqeasi tergovga tortildi. Bosh prokuratura axborot xizmati ma’lum qilishicha, shahardagi banklardan birining kredit bo‘limi mutaxassisi A.T. gumonlanuvchi sifatida qo‘lga olingan. U mijozni o‘ldirib, jasadni Katta Farg‘ona kanaliga tashlaganini iqror bo‘lgan.
Tergov ma’lumotlariga ko‘ra, jabrlanuvchi S.E. 31 mart kuni avtomashina uchun kredit olish maqsadida bank filialiga kelgan. U bilan kredit bo‘limi xodimi o‘rtasida tortishuv yuzaga kelgan. So‘ng ular Tracker rusumli avtomashinada O‘zbekiston tumani “Taraqqiyot” MFY hududiga yo‘l olgan. Bu yerda A.T. oshxona pichog‘i bilan S.E.ni bo‘yin sohasiga bir necha marta urib, qasddan o‘ldirganini tan olgan.
Jasad ish joyida qoldirilib, A.T. ishini davom ettirib, soat 19:00 larda avtomashinasini olib Katta Farg‘ona kanalining O‘zbekiston tumani, To‘lash mahallasi hududiga kelib, jasadni suvga tashlagan.
Hozirda jinoyat ishi O‘zbekiston Respublikasi Jinoyat kodeksining 97-moddasi 1-qismi (qasddan odam o‘ldirish) bo‘yicha qo‘zg‘atilgan. Jabrlanuvchining jasadi hali topilmagan, qidiruv ishlari davom etmoqda.
Qidiruv ishlariga FVVning Farg‘ona viloyat boshqarmasi xodimlari jalb etilgan bo‘lib, mahalliy aholi vakillari ham izlash ishlari davomida ishtirok qilmoqda.
“Zamin”ni Telegramʻda oʻqing!
