Sirdaryo viloyati sudining iqtisodiy ishlar bo‘yicha sudyasi E.S. pora olishda gumon qilinib, 3600 AQSH dollari bilan ashyoviy dalillar asosida qo‘lga olindi.
Oliy sud matbuot xizmati maʼlumotiga ko‘ra, ushbu mansabdor shaxs o‘z ish yurituvidagi iqtisodiy nizoni kassatsiya instansiyasida Guliston shahrida faoliyat yurituvchi masʼuliyati cheklangan jamiyat (MCHJ) foydasiga hal qilib berish evaziga pul talab qilgan va qabul qilganlikda shubha ostiga olinmoqda.
Tezkor tadbir davomida sudya pora sifatida berilgan pul mablag‘ini olgan paytda qo‘lga tushgani qayd etildi. Hodisa ashyoviy dalillar bilan tasdiqlangan.
Oliy sud tomonidan bildirilishicha, sud tizimida korrupsiyaga qarshi kurash, soha shaffofligini taʼminlash va nomaqbul kadrlardan tizimni tozalash bo‘yicha tizimli ishlar olib borilmoqda. Bu borada nazorat va profilaktika choralari yana-da kuchaytirilgan.
Shuningdek, sud xodimlari orasida har qanday noqonuniy harakatlar, xizmat mavqeini suiisteʼmol qilish holatlarining oldini olish ustuvor vazifa ekani taʼkidlandi. Korrupsiyaga aloqador har qanday holat aniqlansa, aybdorlarga nisbatan qonun doirasida qatʼiy chora ko‘rilishi qayd etildi.
Hozirda ushbu holat bo‘yicha tergov harakatlari davom etmoqda. Mazkur voqea sud tizimidagi nazorat va masʼuliyat masalasini yana bir bor kun tartibiga olib chiqdi.
“Zamin”ni Telegramʻda oʻqing!
