Davlat xavfsizlik xizmatining Surxondaryo va Xorazm viloyatlari bo‘yicha boshqarmalari tomonidan o‘tkazilgan tezkor tadbirlar davomida ikki yirik holatda katta miqdordagi giyohvand moddalar fosh etildi.
Birinchi holatda Qo‘shko‘pir tumanida yashovchi, 1985 yilda tug‘ilgan va avval sudlangan shaxs Urganch tumani hududida to‘xtatilib tekshirilganda uning yonidan 4 kg 407 gramm “opiy” moddasi aniqlandi va ashyoviy dalil sifatida rasmiylashtirildi.
Ikkinchi holatda “Beruniy–Urganch” yo‘nalishida harakatlanayotgan “Lasetti” avtomobili Urganch tumanidagi “Cholish” YPX maskanida to‘xtatilib tekshirilgan. Unda bo‘lgan, 2002 yilda tug‘ilgan va muqaddam sudlangan shaxsga tegishli 4 kg 541 gramm “opiy” moddasi borligi aniqlangan.
Tergov maʼlumotlariga ko‘ra, har ikki holatdagi gumonlanuvchilar Afg‘onistondan kontrabanda yo‘li bilan olib kirilgan narkotik moddalarni Xorazm viloyati hududida sotishni rejalashtirgan.
Hozirda ularga nisbatan Jinoyat kodeksining tegishli moddalari bo‘yicha jinoyat ishlari qo‘zg‘atilgan va sud qarori bilan qamoqqa olish ehtiyot chorasi qo‘llangan. Tergov harakatlari davom etmoqda.
Rasmiylar fuqarolarni bunday holatlarga befarq bo‘lmaslikka chaqirib, 1520 qisqa raqami orqali zudlik bilan xabar berish mumkinligini eslatdi. Shaxsiy maʼlumotlar maxfiyligi to‘liq kafolatlanishi taʼkidlandi.
“Zamin”ni Telegramʻda oʻqing!
