Buxoro shahrida 15 aprel kuni yo‘l harakati bilan bog‘liq jiddiy hodisa sodir bo‘ldi. Chery avtomobilini boshqarib kelayotgan haydovchi mast holatda bo‘lgani aniqlanib, yo‘l-transport hodisasiga sabab bo‘ldi.
Ma’lumotlarga ko‘ra, 1981 yilda tug‘ilgan fuqaro Alpomish ko‘chasida harakatlanib ketayotgan vaqtda piyodalarni o‘tkazish uchun to‘xtab turgan Onix avtomobilining orqa qismiga urilib ketgan. Shundan so‘ng u boshqaruvni yo‘qotib, qarama-qarshi yo‘nalishda piyodalarga yo‘l berayotgan Lacetti bilan ham to‘qnashgan.
Afsuski, hodisa davomida piyodalar yo‘lakchasidan o‘tayotgan 2021 yilda tug‘ilgan bola ham urib yuborilgan. Shuningdek, harakat davomida yana bir transport vositasiga zarar yetkazilgan va haydovchi voqea joyidan qochib ketgan.
Tezkor surishtiruvlar natijasida haydovchining spirtli ichimlik ta’sirida bo‘lgani tasdiqlangan. Uning mastlik holati belgilangan tartibda rasmiylashtirilgan.
Holat yuzasidan unga nisbatan Ma’muriy javobgarlik to‘g‘risidagi kodeksning 131-moddasiga asosan bayonnoma tuzilgan. Haydovchi 3 yilgacha haydovchilik huquqidan mahrum qilinishi va 40 baravar bazaviy hisoblash miqdorida jarimaga tortilishi mumkin.
“Zamin”ni Telegramʻda oʻqing!
