Oʻzbekistonda raqamli xizmatlar yanada qulaylashib, aholi uchun yangi imkoniyatlar yaratilmoqda. Endi fuqarolar oʻzlariga tegishli mobil telefon raqamini boshqa shaxs nomiga masofadan turib, onlayn tarzda oʻtkazishi mumkin. Bu haqda MyGov portali rasman maʼlum qildi.
Avvallari bunday jarayon ancha vaqt va harakat talab qilar edi. Yaʼni raqam egasini oʻzgartirish uchun amaldagi ega va yangi foydalanuvchi birgalikda mobil operator ofisiga borishi, navbat kutishi va hujjatlarni joyida imzolashi shart edi. Endi esa bu bosqichlarning barchasi raqamlashtirilib, bir necha bosqichda onlayn tarzda amalga oshiriladi.
Xizmatdan foydalanish jarayoni oddiy: fuqaro My.gov.uz portali yoki MyGov mobil ilovasiga kirib, “Mobil raqamni qayta rasmiylashtirish” boʻlimi orqali ariza yuborishi kerak. Kerakli maʼlumotlar kiritilgandan soʻng, murojaat tasdiq uchun yuboriladi.
Muhim jihat — jarayonda har ikki tomon ham ishtirok etadi. Yaʼni raqamni oʻtkazayotgan shaxs ham, uni qabul qilayotgan fuqaro ham MyID tizimi orqali Face-ID tasdiqdan oʻtishi shart. Bu esa xavfsizlik va shaffoflikni taʼminlaydi.
Arizalar odatda 1 kundan 5 kungacha boʻlgan muddatda koʻrib chiqiladi. Hozircha mazkur xizmatdan Uztelecom, Beeline va Mobiuz abonentlari foydalanishi mumkin. Yaqin vaqtlarda boshqa operatorlar ham ushbu tizimga bosqichma-bosqich ulanishi rejalashtirilgan.
Toʻlov masalasiga kelsak, xizmat narxi har bir operatorning tarif siyosatiga qarab shakllanadi. Ayrim hollarda esa, xususan yaqin qarindoshlar oʻrtasida raqamni oʻtkazish bepul amalga oshirilishi mumkin.
Qisqasi, yangi xizmat orqali ortiqcha ovoragarchilik va vaqt yoʻqotishlarga chek qoʻyilmoqda. Bu esa raqamli Oʻzbekiston sari yana bir qadam, desak mubolagʻa boʻlmaydi.
“Zamin”ni Telegramʻda oʻqing!
