Janubiy Koreyaga ishlash niyatida ketgan 26 yoshli oʻzbekistonlik ayolning uyidan oʻlik holda topilgani haqida avval xabar berilgan edi. Keyingi rasmiy maʼlumotlarga koʻra, uning oʻlimi oʻz joniga qasd qilish bilan bogʻliq ekani aniqlangan.
Tashqi ishlar vazirligi axborot xizmati maʼlum qilishicha, ushbu voqea yuzasidan Oʻzbekistonning Seuldagi elchixonasi ilk kunlardanoq Koreya huquq-tartibot idoralari bilan yaqin hamkorlikda ish olib bormoqda. Asosiy maqsad — holatga aniqlik kiritish va tergov jarayonlarining adolatli oʻtishini taʼminlashdan iborat.
Tergov haqida batafsil maʼlumot berish uchun marhumaning onasi Feruza Alimbekova Koreyaga taklif qilindi. U elchixona va mahalliy politsiya koʻmagida mamlakatga borib, rasmiylar bilan uchrashuvlarda ishtirok etdi.
Joriy yil 14 aprel kuni marhumaning onasi, advokati va elchixona vakillari ishtirokida Pxyontxek shahar politsiyasi masʼullari bilan muloqot boʻlib oʻtdi. Uchrashuv davomida Koreya tomoni oʻtkazilgan qoʻshimcha tekshiruvlar va ekspertiza natijalari yuzasidan maʼlumot berdi.
Maʼlum boʻlishicha, dastlabki tekshiruvlar hamda sud-tibbiyot ekspertizasi natijalariga koʻra, marhumaning oʻlimida zoʻravonlik yoki qotillik alomatlari kuzatilmagan. Shuningdek, voqea sodir boʻlgan tunga oid kuzatuv kameralari tasvirlari ham marhumaning yaqinlariga taqdim etilgan.
Chuqurlashtirilgan tahlillar natijasida Nozima Kimning oʻz joniga qasd qilgani tasdiqlangan. DNK, qon va barmoq izlari tekshiruvi hamda boshqa tibbiy tahlillar davomida uning tanasida zaharli moddalar, dorilar yoki tashqi taʼsirdan kelib chiqqan jarohatlar aniqlanmagan.
Koreya politsiyasi ijtimoiy tarmoqlarda tarqalayotgan ayrim suratlar rasmiy tergov materiallariga tegishli emasligini va ularni tarqatish qonunga zid ekanini alohida taʼkidladi.
Hozirda tergov ishlari davom etmoqda. Uning yakuniy natijalari marhumaning yaqinlariga maʼlum qilinadi.
Oʻzbekiston elchixonasi mazkur ishni nazoratga olganini bildirib, fuqarolardan tasdiqlanmagan va asossiz xabarlarni tarqatmaslikka, marhumaning xotirasini hurmat qilishga chaqirdi.
