Yaponiya ikki nafar oʻzbekistonlikni noqonuniy yashagani uchun deportatsiya qildi
Yaponiya hukumati mamlakatda noqonuniy yashab kelgan ikki nafar O‘zbekiston fuqarosini deportatsiya qildi. Ulardan biri o‘qishdan chetlatilganidan so‘ng talabalik vizasi muddatini buzgan, ikkinchisi esa qisqa muddatli viza bilan kelib, belgilangan vaqtdan ortiq qolib ketgan. O‘zbekistonning Yaponiyadagi elchixonasi fuqarolarni viza qoidalariga qat’iy amal qilishga hamda turistik yoki talaba vizasi bilan ishlash taqiqlanganiga e’tibor qaratishga chaqirdi. Qoidalarni buzgan shaxslar hibsga olinishi va kelgusida mamlakatga kirish huquqidan mahrum etilishi mumkinligi haqida ogohlantirildi.
Yaponiyada noqonuniy yashab kelgan ikki nafar Oʻzbekiston fuqarosi mamlakatdan chiqarib yuborildi.
Bu haqda Oʻzbekistonning Yaponiyadagi elchixonasi maʼlum qilib, viza qoidalariga amal qilish muhimligini yana bir bor taʼkidladi.
Maʼlumotlarga koʻra, fuqarolardan biri talabalik vizasi bilan kirgan, ammo oʻqishdan chetlatilganidan soʻng ham mamlakatni tark etmagan. Ikkinchi shaxs esa qisqa muddatli viza bilan kirib, belgilangan muddat tugaganiga qaramasdan Yaponiyada qolgan.
Yaponiya tomoni taʼkidlashicha, qisqa muddatli vizalar orqali ishlash qatʼiyan taqiqlangan.
Shuningdek, talabalik vizasi faqat taʼlim olish uchun berilib, oʻqish toʻxtatilsa, yashash huquqi ham bekor qilinadi. Mutaxassislar “turizm” yoki “talaba” vizasi orqali uzoq muddat qolish yoki ishlash mumkinligi haqidagi maʼlumotlar notoʻgʻri ekanini bildirdi.
Qayd etilishicha, noqonuniy yashovchilar aniqlansa, ular hibsga olinib, keyinchalik deportatsiya qilinadi.
Izohlar 0
…