Suriyaning shimoli-g‘arbida xavfsizlik kuchlari tomonidan o‘tkazilgan maxsus amaliyot davomida bir guruh o‘zbek jangchilari qo‘lga olingani ma’lum qilindi. Bu haqda Reuters axborot agentligi xabar berdi.
Dastlabki ma’lumotlarga ko‘ra, Idlib hududida qurolli shaxsni qo‘lga olishga urinish ortidan vaziyat keskinlashgan. Shundan so‘ng ayrim o‘zbek jangchilari uning ozod etilishini talab qilib, norozilik namoyishlari uyushtirgan. Bu holat tez orada xavfsizlik idoralari binosi oldida to‘qnashuvlarga sabab bo‘lgan.
Idlib viloyatining bir qator hududlarida, jumladan Kafriya va al-Fua aholi punktlarida reydlar o‘tkazilib, namoyishda qatnashgan shaxslar nishonga olingan. Ayrim joylarda otishmalar kuzatilgani, hududga qo‘shimcha kuch va texnika jalb etilgani aytilmoqda.
Hozircha qo‘lga olingan o‘zbeklar soni aniq emas. Turli manbalarga ko‘ra, 2025 yil holatida Suriyada 1500 nafarga yaqin o‘zbek jangchilari bo‘lgan va ularning ayrimlari oilalari bilan yashab kelgan.
Mutaxassislar ushbu hodisani so‘nggi oylar ichida hukumat kuchlari va xorijiy jangchilar o‘rtasidagi navbatdagi keskin to‘qnashuv sifatida baholamoqda. Avvalroq ham Turkiya chegarasi yaqinida shunga o‘xshash mojaro yuzaga kelgan edi.
Ayni paytda Suriya hukumati xorijiy jangchilar maqomini tartibga solish va ularni rasmiy tuzilmalarga jalb etish choralarini ko‘rmoqda.
“Zamin”ni Telegramʻda oʻqing!
