Buxoro viloyatining Vobkent tumanida YPX xodimi ishtirokida yo‘l-transport hodisasi sodir bo‘ldi. Ijtimoiy tarmoqlarda tarqalgan videolardan so‘ng holat yuzasidan viloyat Yo‘l harakati xavfsizligi boshqarmasi rasmiy ma’lumot berdi.
Ma’lum qilinishicha, voqea 27 aprel kuni soat 09:05 atrofida Vobkent tumanidagi Imom Buxoriy ko‘chasida ro‘y bergan. YHXB xodimi Yo. Mavlonov o‘zining Cobalt rusumli avtomobilini boshqarayotib, piyodalar yo‘lagidan o‘tayotgan 2009 yilda tug‘ilgan qiz — S.N.ni urib yuborgan.
Hodisa oqibatida qiz yengil tan jarohatlari olgan. Ma’lumotlarga ko‘ra, haydovchi jabrlanuvchiga dastlabki tibbiy yordam ko‘rsatish maqsadida uni shifoxonaga olib borgan.
Shuningdek, xodim xizmat vazifasini bajarayotgan vaqtda hushyor holatda bo‘lgani va avtomobilni boshqarish uchun barcha zarur hujjatlarga ega ekani aytilmoqda.
Ayni paytda mazkur holat bo‘yicha Vobkent tumani prokuraturasi tomonidan tergovga qadar tekshiruv ishlari olib borilmoqda.
