Andijon viloyatida o‘tkazilgan navbatdagi reyd davomida bolalar xavfsizligi bilan bog‘liq jiddiy qoidabuzarlik aniqlandi. YPX xodimlari tomonidan to‘xtatilgan mikroavtobusda 58 nafar bola tashilayotgani ma’lum bo‘lgan.
Viloyat YHXX ma’lumotiga ko‘ra, holat 6 may kuni Izboskan tumanidagi O‘rta qishloq mahallasi hududida qayd etilgan. Mumtoz ko‘chasida harakatlangan King Long rusumli mikroavtobus inspektorlar tomonidan tekshiruv uchun to‘xtatilgan.
Tekshiruv jarayonida haydovchi Q.Z. davlat-xususiy sheriklik asosida faoliyat yurituvchi ta’lim muassasasining 58 nafar tarbiyalanuvchisini olib ketayotgani aniqlangan.
Mutasaddilarning bildirishicha, mazkur holat yo‘l harakati qoidalarining “odam tashish” bilan bog‘liq talablariga zid hisoblanadi. Shu sababli haydovchiga nisbatan Ma’muriy javobgarlik to‘g‘risidagi kodeksning tegishli moddasi asosida bayonnoma rasmiylashtirilgan.
Shuningdek, haydovchi va ta’lim muassasasi mas’ullari bilan bolalarni xavfsiz tashish bo‘yicha profilaktik suhbat o‘tkazilgani ma’lum qilindi.
Eslatib o‘tish joiz, shu kabi holatlar avval ham kuzatilgan. Xususan, Samarqand viloyatida o‘tkazilgan reydlarda Damas avtomobilida 28 nafar bola tashilayotgani aniqlangan edi. Yana bir holatda esa yengil avtomobilga 24 nafar bog‘cha tarbiyalanuvchisi joylashtirilgani ma’lum bo‘lgan.
